Hönnupottar

Matseld í einstökum potti

Upphaflega notaði ég leirpottana eingöngu við brauðbakstur og kallaði þá brauðpotta. Með tímanum hafa þeir tekið breytingum og notkunamöguleikar þeirra aukist en hægt er að elda ýmsar kræsingar í brauðpottunum góðu. Ég rek keramikstudio ásamt tveimur öðrum en það er svo gaman að geta tengt saman mataráhugann og keramikið.  

Leirpottarnir eru allir handrenndir og eru því engir tveir eins.  Stærðin er mismunandi og sama má segja um notkunargildi þeirra.  Til dæmis er hægt að elda heilan kjúkling í stærri pottunum en þeir minni eru tilvaldir fyrir kjúklingabita.

Pottastærð

     Lítill pottur hentar vel fyrir 1 – 2

    Stór pottur hentar vel fyrir 3 – 5

     Hár pottur sem víkkar út er tilvalinn fyrir brauðbakstur

    Pottlok með þremur – fjórum hnúðum má einnig nota sem skál 

Eldað með loki

Uppgufun er lítil sem engin og rétturinn eldast í eigin raka. Kjötið verður safaríkara og á það sérstaklega við þegar eldaður er heill kjúklingur

Bakað í potti

Potturinn er látinn hitna með ofninum. Deigið sett í heitan pottinn og bakast því á hærri hita. Brauðið nær að lyftast betur og heldur fallegri lögun

Eldað án loks

Potturinn er eins og eldfast mót

 

Pottarnir er tilvaldir fyrir m.a.

  • Brauðbakstur
  • Fiskrétti
  • Grænmetisrétti og ofnbakað grænmeti
  • Kjúkling
  • Hægeldun
  • Heita eftirrétti
  • Ostakökur

Uppskriftir fyrir pottana má finna hér

Ég hef verið að selja pottana sem ég geri en á aldrei marga potta til á lager.  Pottarnir eru allir handrenndir og sama má segja með alla hankana sem á þeim eru.  Einnig er ég oft að vinna með að lokið geti líka verið skál ein og sér. Hver pottur þarf því mikið dúllerí sem gerir það að verkum að vinnslan er mjög tímafrek en markmið er að hver pottur sé í senn listaverk og nytjahlutur.

 

Hönnupottar – einfaldari útgáfa

Þessa dagana er ég að vinna að einfaldari útgáfu af pottum og þ.a.l. ódýrari.  Pottar sem þjóna sama tilgangi … til að baka og elda í en eru samt einstakir 🙂

Hægt er að fylgjast með á instagraminu @galleriholshraun

Frekari upplýsingar um pottana er hægt að fá með því að senda tölvupóst á hanna@hanna.is

 

Fyrsta útgáfa af einfaldari pottunum – passa fyrir bæði brauð, kjúlla og margt fleira ♡

Verð: 20.000 – 25.000 kr