Páskalegur forréttur með rækjum
Uppruni
Frískandi og góður réttur frá mömmu sem hún hefur í gegnum tíðina haft sem forrétt á páskadag. Framreiðslan er frjálsleg en rétturinn er afskaplegar einfaldur og góður. Árlegur páskaforréttur sem gefur vísbendingu um að vorið sé framundan.
Forvinna
Eggjablönduna er betra að gera daginn áður og geyma í kæli. Best er að láta rækjurnar þiðna í kæli yfir nótt.
Hráefni
Eggjablanda
- Hálfur gulur laukur – saxaður smátt
- 3 egg – harðsoðin
- ½ dl olía
- ½ dl sætt sinnep
- Nýmalaður pipar
Annað hráefni
- U.þ.b. 600 g rækjur
- Maisbaunir – ferskar/frosnar og soðnar eða niðursoðnar
- Ristað brauð – má sleppa
- Hugmyndir að skrauti: Sítrónusneið, steinselja, hrogn, sneið/bátur af eggi, tómatsneið eða flís af niðurskorinni papriku
Verklýsing
Eggjablanda
- Egg harðsoðin. (Suðan látin koma upp – ekki of hratt þá springa eggin frekar. Láta vatnið sjóða en ekki bullsjóða í u.þ.b. 9 mínútur)
- Egg kæld og skurnin tekin af. Skorin niður í eggjaskerara – a.m.k. þrisvar sinnum
- Olía og sinnep sett í skál – blandað saman. Söxuðum lauk og eggjum blandað saman við
- Smá pipar og smakkað til. Sett í kæli og leyft að taka sig – helst yfir nótt
Samsetning
Hægt er að bera fram á ýmsan máta. T.d. má mynda hringlaga rækjuhreiður og setja eggjablönduna í miðjuna og skreyta með maisbaununum auk steinselju. Einnig er hægt að skera út hringlaga ristað brauð og raða eggjablöndunni og rækjunum ofan á. Maíisinn settur efst (gott að nota hringmót til að haldist betur þegar raðað er ofan á hvort annað – þegar hringformið er tekið dreifist maísinn yfir – fallegt skraut). Svo má bara fara einfalda leið og raða öllu bara á diskinn. Skreytt t.d. með sítrónusneið, eggjasneið, steinselju og/eða öðru grænmeti.
