Páskalegur forréttur með rækjum
Uppruni
Frískandi og góður réttur frá mömmu en undanfarin ár hefur hún haft hann sem forrétt á páskadag.
Forvinna
Eggjablönduna er betra að gera daginn áður og geyma í kæli. Best er að láta rækjurnar þiðna í kæli yfir nótt.
Hráefni
Eggjablanda
- Hálfur gulur laukur – saxaður smátt
- 3 egg – harðsoðin
- ½ dl olía
- ½ dl sætt sinnep
- Nýmalaður pipar
Annað hráefni
- U.þ.b. 600 g rækjur
- Maisbaunir – frosnar og soðnar eða niðursoðnar
- Hugmyndir að skrauti: Sítrónusneið, steinselja, sneið/bátur af eggi, tómatsneið eða flís af niðurskorinni papriku
Verklýsing
Eggjablanda
- Egg harðsoðin. (Suðan látin koma upp – ekki of hratt þá springa eggin frekar. Láta vatnið sjóða en ekki bullsjóða í 9-10 mínútur)
- Egg kæld og skurnin tekin af. Skorin niður í eggjaskerara – a.m.k. þrisvar sinnum
- Olía og sinnep sett í skál – blandað saman. Söxuðum lauk og eggjum blandað saman við
- Smá pipar og smakkað til. Sett í kæli og leyft að taka sig – helst yfir nótt
Samsetning
Rækjum, maisbaunum og eggjablöndu raðað á disk. Skreytt t.d. með sítrónusneið, eggjasneið, steinselju og/eða öðru grænmeti.