Hrákjöt með parmesanosti
Uppruni
VARÚÐ… þessi réttur er alls ekki fyrir alla en hann er stútfullur af próteini. Ég veit ekki alveg hvað það er með mig en ég er bara alveg sólgin í beef tartar rétti. Það má leika sér töluvert með hráefnin en öllu máli skiptir að vera með gæða kjöt. Ég nota stundum endann af nautalundinni (hausinn) – en oftast fer ég eftir ráðleggingum fagaðila hvaða bita á að velja…. þeir mæla með nautafile (gott og ódýrara en lundin). Þar sem ekki allir á heimilinu borða beef tartar þá kaupi ég stundum ríflegt og læt afgangsbitann í frystinn. Þá er mjög auðvelt að skella í góðan rétt á örstuttum tíma. Það sem er svo skemmtilegt við beef tartar er að það má leika sér svolítið með það sem þú blandar saman við… og eins hvaða meðlæti er boðið upp á. Hér kemur fyrsta útgáfan mín af beef tartar en hana má útbúa sem aðalrétt eða forrétt… en betra að það sé kjötfólk sem er að setjast að borðum.
Þar sem við erum að vinna með hrátt kjöt þarf að hafa eftirfarandi í huga:
- Hreinlæti þar sem við erum að handfjatla hrátt kjöt
- Nota íslenskt gæðakjöt – skera frá sinar og fitu
- Til að forðast baktreríur er meginreglan sú að geyma kjötið í kæli og jafnvel að skella því aðeins í frystinn (með því að hafa kjötið hálffrosið er auðveldara að skera það niður). Kjötið er því ekki látið standa lengi í stofuhita
- Ekki fyrir ófrískar konur
Hráefni
- 150 – 160 g íslenskt nautakjöt eins og nautafile eða nautalund
- 1 tsk capers – saxað
- 10 þunnar sneiðar af chili – má svo skera í tvennt
- 2 tsk olía
- 2 tsk majones
- 1 – 2 msk skarlottulaukur – saxaður smáltt
- Aðeins af dijon sinnepi – á hnífsoddi
- Parmesanostur – rifinn fínt (má sleppa)
- Salt og pipar
- Þeir sem vilja fara alla leið geta toppað með einni eggjarauðu
Verklýsing
- Skera kjötið niður smátt. Það eru til ýmsar leiðir með það … sumir skera það fyrst langsum og svo hvern bita aftur langsum og síðan þvert í litla bita… það er smekksatriði hversu fínt kjötið er saxað niður. Það má alveg gera töluvert áður en kjötið er borið fram en þá skiptir máli að geyma það í lokuðu íláti í kæli. Best að taka kjötið úr kæli aðeins áður en það er borið fram svo að það nái stofuhita
- Olíu, majonesi, capers, chili, sinnepi og skarlottulauk blandað saman í skál. Kjötið hrært saman við stuttu áður en það er borið fram (rétturinn má alveg bíða í klukkustund tilbúinn inni í kæli)
- Það getur verið fallegt að setja hringmót á diskinn og kjötið ofan í það – þrýsta aðeins á. Þegar hringurinn er fjarlægður er fallegur forréttur eða aðalréttur á disknum (einn skammtur í 6 cm hringmóti er u.þ.b. 37 g)
- Að lokum er vel af parmesanosti rifið yfir (má sleppa þar sem sumum þykir það algjört nono) – pipar og saltflögum stráð yfir
Hráefni
