Grillaður þorskhnakki með halloumi osti og ólífum
Uppruni
Í góða veðrinu í sumar hefur mikið verið grillað og þá aðallega kjöt. Um daginn langaði mig til að grilla fisk enda alltaf að verða meiri og meiri fiskikona. Setti þorskhnakka í smá lög og lét hann standa í nokkrar klukkustundir. Eiginmaðurinn fékk grind fyrir pinna til að setja á grillið í afmælisgjöf og alveg gráupplagt að grilla fiskinn þannig. Hann festist þá ekki á sjálfu grillinu. Glimrandi góður fiskréttur og léttur í maga. Ef dagurinn á að vera sérstaklega léttur er bara boðið upp á salat með fiskinum. En ef á að gera vel við sig er Frábært kúskús – gott meðlæti og heimagert Hvítlauksmajónes æði – allt saman. Kosturinn er að hægt er að útbúa allt meðlæti fyrirfram og þræða upp á spjótin….þá er bara eftir að grilla fiskinn og veislan er klár.
Hráefni
- 800 g þorskhnakki eða annar fiskur
- 1 pakki (250 g) halloumi ostur – má sleppa
- Grænar ólífur – ein á hvert stjót
Lögur
- 3 – 5 msk fersk mynta (má einnig blanda með steinselju) – söxuð
- ½ rauður chilipipar – fræhreinsaður og saxaður smátt
- 2 msk engifer – rifið
- 2½ – 3 msk fiskisósa
- 2 msk olía
- Sítrónubörkur af einni lífrænni sítrónu – rifinn
- Salt og pipar
Verklýsing
- Fiskurinn er skorinn niður í 3 – 4 cm þykka bita og sama er gert við halloumi ostinn
- Hráefnið í löginn er sett í skál og fiskbitarnir ofan í – látið vera um stund
- Fiskbitum, ólífu og halloumi osti þrætt upp á grillpinna – yfirleitt set ég 2 fiskbita, 1 halloumibita og 1 ólífu á hvert spjót en það má auðvitað gera eins og hver og einn vill
- Grillið hitað og fiskurinn grillaður í u.þ.b. 3 mínútur á hvorri hlið. Eins og kom fram fyrir ofan set ég fiskispjótin á þar til gerða grind og liggur fiskurinn því ekki á grillinu sjálfu
Í vinnslu
Pinnar settir á bakkann
