Kartöflumúsartgratín
Uppruni
Þessi uppskrift kemur frá mömmu en hún er alltaf með gratíneruð kartöflumúsarhreiður á jólahlaðborðinu. Uppskriftin er úr gömlu, sænsku bókinni hennar. Samkvæmt henni á að nota egg þegar kartöflumúsin er gratíneruð en þá kemur fallegri litur á hana.
Hráefni
- 1 kg kartöflur (vatn og salt)
- 2½ dl heit mjólk (upp að suðu)
- 1 – 2 msk smjör
- 2 eggjarauður eða 1 egg
- Salt og hvítur pipar
Verklýsing
- Kartöflurnar soðnar (settar í kalt vatn og saltað aðeins – suðan látin koma upp, hitinn lækkaður og látið sjóða í u.þ.b. 20 mínútur). Karöflurnar má flysja áður en þær eru soðnar eða strax eftir suðu
- Mjólk hituð í potti (til að spara uppþvott er gott að nota sama pottinn og nota á fyrir kartöflumúsina í lokin)
- Kartöflurnar eru pressaðar heitar. Heitri mjólkinni bætt við – ath bara lítið í einu á meðan hrært er kröftuglega (best að nota hrærivél)
- Smjöri, eggjarauðum (eggi) og kryddi bætt í og hrært saman við
- Ofninn stilltur á 275°C (yfir- og undirhiti)
- Kartöflumúsin sett í rjómasprautu (með breiðu opi) og toppum sprautað í eldfast mót. Einnig er hægt að dreifa úr músinni í eldfast fat en topparnir eru óneitanlega fallegri og hátíðlegri
- Látið inn í ofn í 10 mínútur en tekið út um leið og kominn er fallegur litur á toppana