Sætkartöflustappa - einföld og fljótleg
Uppruni
Sætar kartöflur eru vinsælar hjá unga fólkinu hér á bæ. Þessi stappa er einföld og fljótleg og á vel við með ýmsum kjötréttum. Við hátíðleg tækifæri er gaman að sprauta sætkartöflustöppunni í fallega toppa – slíkt puntar upp á matarborðið.
Forvinna
Sætkartöflustöppuna má útbúa samdægurs eða daginn áður og hita upp. Toppana er upplagt að gera fyrr um daginn og hita svo rétt áður en maturinn er borinn fram.
Hráefni
- 1 kg sætar kartöflur
- 3 msk smjör
- 1 – 1½ tsk salt
- 1 tsk pipar
Verklýsing
- Kartöflurnar flysjaðar, skornar í litla bita og soðnar (settar í kalt vatn og saltað aðeins – suðan látin koma upp, hitinn lækkaður og látið sjóða í u.þ.b. 8 mínútur eða þar til bitarnir eru mjúkir í gegn). Vatnið láta renna af og bitarnir maukaðir í matvinnsluvél eða með töfrasprota
- Smjöri, salti og pipar bætt í – hrært saman við
- Ef stappan er sett í hátíðlegan búning: Ofninn stilltur á 225°C (yfir- og undirhiti)
- Kartöflustappan sett í rjómasprautu (með breiðu opi) og toppum sprautað í eldfast mót
- Látið inn í ofn í u.þ.b. 10 mínútur en tekið út um leið og kominn er fallegur litur á toppana. Fallegt að skreyta aðeins saltflögum eða nýmuldum pipar
