Súrdeigsbrauð með þurrkuðum ávöxtum og hnetum
Uppruni
Þessi uppskrift er heimatilbúin en það er ekki langt síðan ég byrjaði að nota þurrkaða ávexti í hinu og þessu. Einnig langaði mig að prófa að hafa brauðið mjög þétt í sér og með litlu hveiti. Niðurstaðan varð þetta brauð. Það gott nýbakað og eldist vel – gott mörgum dögum seinna og þá beint úr brauðristinni. Tilvalið að frysta brauðið niðurskorið.
Forvinna
Deigið þarf að standa í kæli yfir nótt.
Hráefni
- 200 g súrdeigsgrunnur
- 1½ tsk salt
- 2 msk valhnetuolía
- 1 msk hunang – má sleppa ef önnur sæta er með eins og t.d.í apríkósum
- 4 dl vatn
- 40 g sólblómafræ
- 20 – 40 g graskerafræ
- 60 – 70 g valhnetur
- 25 – 30 g rúsínur
- 100 – 150 g apríkósur
- 6 – 7 dl rúgsigti (3 dl rúgmjöl og 3 dl hveiti). Það má minnka rúgmjölið og bæta við hveitið í staðinn – verður léttara í sér
Verklýsing
- Öllu hráefni blandað vel saman í skál. Plastfilma sett yfir og sett í kæli yfir nótt (8 – 10 klukkutíma)
- Deigið tekið út, sett á hveitistráð borð og brotið í þrennt eins og gert er þegar súrdeigsbrauð er bakað (sjá myndir Gott súrdeigsbrauð). Endurtekið 2 -3 sinnum
- Sólkjarnar, graskerafræ og/eða þurrkuð epli sett á þá hlið sem snýr upp (skurðhliðin vísar niður).
- Hveiti stráð yfir brauðið og sett í hveitistráða körfu/skál þar sem það er látið vera á hvolfi. Ef notuð er skál getur verið gott að hafa hveitistráðan klút undir brauðinu
- Brauðið er látið standa í 6 – 8 klukkutíma en bakað í u.þ.b. 1½ klukkutíma við 220°C hita. Fínt að setja kjöthitamæli í brauðið. Þegar hitinn hefur náð 90°C ætti það að vera tilbúið. Ef sett eru þurrkuð epli er gott að leggja álpappír yfir brauðið þegar brauðið og eplin hafa tekin einhvern lit – annars geta þau brunnið
Meðlæti
Gott með ýmsum tegundum af hummus, rauðrófumauki eða bara með smjöri og osti.
