Einfalt og gott ceviche
Uppruni
Um daginn fékk ég þennan rétt hjá vinkonu minni og tókst að væla út uppskriftina. Frábært að bjóða upp á hann sem forrétt eða sem smárétt á veisluborðið. Mér finnst hann léttur og góður sem aðalréttur með nýbökuðu súrdeigsbrauði og góðu íslensku smjöri. Algjört lostæti fyrir bragðlaukana.
Forvinna
Hægt að útbúa fyrr um daginn – þolir að standa í kæli.
Hráefni
- 1 kg lúða, smálúða eða þorskhnakki (u.þ.b. 800 g hreinn fiskur)
- U.þ.b. 12 stk lime (280 – 300 ml limesafi – má setja nokkra ml af sítrónusafa í staðinn)
- 125 ml græn ólífuolía
- ¾ dl rauðlaukur – saxaður
- 10 – 15 litlir tómatar – skornir í bita
- 1 dl grænar fylltar ólífur – skornar í bita eða sneiðar
- ¾ dl kapers – skorið gróft
- ½ – ¾ dl jalapeno – saxað
- 1½ dl ferskur koríander – saxaður
Dressing
- 1 tsk rauðvínsedik
- ¼ dl limesafi
- ¾ dl olía
- ½ tsk saltflögur
- ½ tsk pipar
- 1 msk oreganó
- 4 dropar rautt tabasco
Verklýsing
- Fiskurinn skorinn í fingurþykkar ræmur og svo hver ræma í jafnstóra bita – sett í skál
- Limesafa hellt yfir – látið standa í a.m.k. 2 klukkustundir við stofuhuta – þolir að standa yfir nótt í kæli ef notaður er feitur fiskur eins og smálúðu
- Safinn skilinn frá fiskinum – hluti af honum notaður í dressinguna
- Dressing útbúin og blandað saman við fiskbitana ásamt afgangi af hráefninu
