Ofnbakaður saltfiskur að hætti Portúgala
Uppruni
Þessi uppskrift kemur frá Sólveigu, sem býr í Portúgal, en saltfiskur er veislumatur þar. Hann er oft á borðum hjá okkur á föstudaginn langa. Stundum helminga ég uppskriftina en þá er hún mátuleg í eitt fat og dugar fyrir 4 – 5. Ég nota oft leirpottana mína fyrir þennan rétt.
Forvinna
Hægt er að útbúa réttinn fyrr um daginn og eiga bara eftir að setja hann í ofninn.
Hráefni
- 1,5 kg útvatnaður saltfiskur
- 1 kg kartöflur
- 3-5 laukar (600 g) – saxaðir
- 1-2 dl ólífuolía
- 3-4 hvítlauksrif – pressuð
- ½ l matreiðslurjómi
- 2 dl mjólk eða rjómi
- 200 g ostur
- 3 stífþeyttar eggjahvítur
- 3 – 5 harðsoðin egg
- pipar, steinselja, múskat (má sleppa)
- Smjör og olía til steikingar
Verklýsing
- Saltfiskurinn soðinn: Fiskurinn settur í pott með köldu vatni og suðan látin koma upp. Htinn lækkaður og fiskurinn er látinn sjóða í u.þ.b. 10 -15 mínútur (háð stærð bitanna). ATH. Fiskurinn má alls ekki bullsjóða – þá verður hann þurr. Kartöflur soðnar: Kartöflur settar í kalt vatn og suðan látin koma upp. Hitinn lækkaður og kartöflurnar soðnar í u.þ.b. 20 mínútur. Eggin soðin: Eggin sett í pott með köldu vatni og suðan látin koma upp. Hitinn lækkaður og eggin látin sjóða í 8 – 10 mínútur
- Olía og aðeins af smjöri sett í pott. Hvítlaukur og laukur sett í pottinn – látið malla á lágum hita á meðan saltfiskur og kartöflur er soðið. Mikilvægt að laukurinn fái að malla góða stund á lágum hita – bragðið verður mildara og með smá sætum keim.
- Fiskurinn hreinsaður, skorinn í litla bita og bætt út í laukinn
- Mjólk/rjóma hellt í og verður kássan að þykkum jafningi
- Osturinn rifinn og 3/4 af honum bætt út í
- Steinselju og pipar bætt við
- Kartöflur flysjaðar, skornar í sneiðar og settar í botninn á smurðu eldföstu móti eða í leirpott
- Smávegis af múskati stráð yfir
- Stífþeyttum eggjahvítum blandað varlega saman við fiskikássuna og hellt yfir kartöflurnar
- Eggjabátar settir ofan á, og 1/4 af rifna ostinum stráð yfir. Einnig gott að rífa parmesanost yfir ef hann er til
- Bakað í ofni við 180°C í 30-45 mínútur. Ef eldað er í leirpotti er lokið haft á en tekið af síðustu 15 mínúturnar
Meðlæti
Borið fram með salati og nýbökuðu brauði eins og hvítlauksbrauði
Saltfiskréttur í vinnslu
