Vinsælar naanbollur
Uppruni
Ég fékk uppskriftina hjá Drífu minni. Hún bakaði þessar naanbollur hér heima um daginn og slógu þær heldur betur í gegn. Ég er búin að baka þær nokkrum sinnum og finnst þær alltaf jafngóðar – ef þær klárast ekki með matnum þá eru þær búnar daginn eftir.
Hráefni
- 2 dl mjólk – volg (ekki hærra en 37°C)
- 2 msk sykur
- 1 bréf þurrger (11 g)
- 600 g hveiti
- 1 tsk salt
- 2 tsk lyftiduft
- 4 msk olía
- 2 dl ab-mjólk eða 1 dós hrein jógúrt
Ofan á
- 25 – 30 g smjör
- 1 – 2 hvítlauksrift – smátt söxuð
- Ferskt kóriander og/eða steinselja (einnig má nota aðrar kryddjurtir eða krydd eins og shawarma eða garam masala)
- 1 msk gróft salt
Verklýsing
- Ger, sykur og volg mjólk sett saman í skál – látið standa í 15 mínútur
- Hveiti, salti, lyftidufti, olíu og jógúrt bætt saman við mjólkurblönduna og hnoðað saman – ath. betra að setja helminginn af hveitinu fyrst og bæta svo við jafnt og þétt á meðan deigið er hnoðað (verra ef deigið er of þurrt)
- Rakur klútur settur yfir skálina og deigið látið hefast í 1 klukkustund
- Ofninn stilltur á 250°C (yfir- og undirhiti)
- Deiginu skipt í 20 bita og kúlur mótaðar
- Hver bolla er mótuð með því að teygja og toga létt með höndunum. Bollunum raðað í ofnskúffu með bökunarpappír – gott að láta þær standa í u.þ.b. 15 mínútur áður en þær eru settar í ofninn
- Kryddjurtir og salt blandað saman á einn disk. Brætt smjör og hvítlaukur (saxaður eða pressaður) blandað saman og sett á annan disk
- Brauðið bakað í 4 – 6 mínútur – frekar ofarlega í ofninum. Mikilvægt að fylgjast vel með eftir 4 mínútur þar sem þær dökkna fljótt
- Efri hlutanum er dýpt ofan í hvítlaukssmjörið og síðan í kryddblönduna. Setja má meira af kryddblöndunni á brauðið með fingrunum (kemur ekki alltaf alveg nóg með því að bara dýfa)
- Sett á ofngrind og smjörið látið setjast aðeins
- Best að borða bollurnar nýbakaðar en það má líka velgja þær með því að setja þær aðeins í volgan ofn (50° – 80°C) og bera þær svo fram
- Bollurnar eru langbestar nýbakaðar en líka fínar daginn eftir