Hafrakexið hennar mömmu
Uppruni
Hér áður fyrr bakaði mamma alltaf hafrakex fyrir jólin. Með árunum fækkaði tegundunum hjá henni og eru mörg ár síðan ég hef fengið hafrakexið hennar. Mér þótti það að vísu alltaf síst en borðaði það þegar allar hinar tegundirnar voru búnar. Það var best með smjöri og osti. Í dag kann ég betur að meta hafrakex, kaupi það stundum og ákvað því að dusta rykið af uppskriftinni. Ég varð ekki fyrir vonbrigðum og heimilisfólkið varð mjög ánægt með framtakið. Ég var vinsamlegast beðin um að baka kexið oftar.
Forvinna
Betra að hnoða deigið daginn áður en það er bakað – má jafnvel geyma það í nokkra daga í kæli.
Hráefni
- 4 bollar hafragrjón
- 2 bollar hveiti
- 1 bolli sykur
- 250 g smjör – við stofuhita (ágætt að skera það í litla bita ef það er ekki alveg mjúkt)
- 1 bolli mjólk
- 1 tsk matarsódi
- 2 tsk lyftiduft
- ½ tsk hjartarsalt
Verklýsing
- Öllu hráefni blandað saman og hnoðað vel. Deigið á að vera blautt en jafnvel má setja 1 – 2 dl af hveiti til viðbótar. Deigið sett á disk – plastfilma lögð yfir og geymt í kæli yfir nótt (má geyma í nokkra daga)
- Ofninn hitaður í 220°C (yfir- og undirhiti)
- Deigið tekið úr kæli og skipt í u.þ.b. 4 – 8 hluta. Einn hluti tekinn og flattur út – gott að vera með tvær arkir af bökunarpappír til að auðvelda að fletja deigið út (sjá myndir)
- Smekkstatriði hversu þunnar eða þykkar kökurnar eiga að vera – glas eða hringlaga form notað til að skera út kökurnar. Þær eru síðan lagðar á bökunarplötu með bökunarpappír/fjölnotapappír) – gott að nota hníf til að taka kökurnar upp og leggja þær á plötuna. Mikilvægt að pikka kökurnar með gaffli (annars myndast loftbólur)
- Bakað neðarlega í ofni í u.þ.b. 6 mínútur – bökunartíminn er í samræmi við þykktina á kökunum. Ef þær eru mjög þykkar þurfa þær lengri tíma og öfugt. Liturinn er einnig smekksatriði – sumir vilja hafa þær ljósar á meðan öðrum finnst betra að hafa þær dekkri
Geymsla: Kökurnar geymast mjög vel – á fati eða í lokuðu boxi (ekki í loftþéttu – þá verða þær mjúkar).
Verklýsing 1 – deigið útbúið
Verklýsing 3 – deigið flatt út
Verklýsing 4 – gott að nota hníf til að taka afskurðinn
Verklýsing 4 – mikilvægt að pikka kökurnar með gaffli
Kökur gerðar úr afskurði
Verklýsing 5
Má frysta hafrakexið?
Ég hef aldrei prófað það þar sem kexið geymast von úr viti í lokuðu boxi (við stofuhita) 🙂