Hanna

Ein helstu áhugamál mín eru matargerð og bakstur og má líklega rekja það til þess að ég var alin upp á miklu matarheimili.  Móðir mín hefur boðið upp á dýrindis mat í gegnum tíðina og jafnframt verið opin fyrir nýjungum.  Í hennar matargerð gætir mjög sænskra áhrifa eftir langa dvöl í Svíþjóð. Afkomendur hennar hafa því alist upp með þessum uppskriftum og hafði oft komið til tals að safna þeim öllum á einn stað.

Auk þess hef ég komið mér upp nokkuð góðu safni af öðrum uppskriftum héðan og þaðan enda mikið eldað á heimilinu.  Oft hefur farið mikill tími í að leita að einhverri uppskrift og stundum án árangurs. Þessi heimasíða er því leið til að koma skipulagi á uppskriftir heimilisins og njóta um leið góðu réttanna hennar mömmu.

Ef aðrir geta nýtt sér þennan gagnabanka þá gleður það mig ♡

 

Ég geri ýmislegt annað mér til skemmtunar og safna því saman hér –  mest fyrir sjálfa mig og mína.

 

Myndlist og keramik

Síðustu ár hef ég rekið tvær vinnustofur, keramikvinnustofu með tveimur vinkonum mínum og málningarvinnustofu með tveimur öðrum vinkonum mínum.  Fyrir tæpu ári flutti ég vinnustofur mínar á einn stað í Hólshrauni 7 í Hafnarfirði en þar get ég bæði málað og leirað.  Þar erum við þrjár leirvinkonur saman og í sumar opnuðum við vinnustofu okkar og gallerí, Gallerí Hólshraun.

Ég er viðskiptafræðingur og kennari að mennt.  Á um 10 ára tímabili sótti ég námskeið í málun og keramiki  hjá Myndlistarskóla Íslands og Myndlistarskóla Kópavogs auk annarra námskeiða.

 

Keramik

Mataráhuginn og keramikið hefur tengst saman og hef ég verið að búa til potta sem upphaflega voru meira hugsaðir sem brauðpottar en hafa verið að taka breytingum til að auka notkunarmöguleikana.  Auk pottanna hef ég gaman af því að búa til vasa, könnur, skálar eða bara það sem á hugann í það og það skiptið.

 

Málverk

Sumarið 2017 kynntist ég efninu cold wax og breytti það töluvert mínum stíl.  Eiginlega má segja að ég hafi þar fundið mitt efni og eftir það hef ég nær eingöngu notað það í olíumyndunum mínum.

Hér má sjá dæmi um verk mín:

 

 

Frekari upplýsingar er hægt að fá með því að senda tölvupóst á hanna@hanna.is