Indverskt læri
Uppruni
Uppskriftin kemur frá mömmu og hefur þessi réttur verið reglulega á borðum í mjög mörg ár. Hann er sérstaklega góður og tiltölulega einfaldur. Mamma hefur alltaf borið hann fram með hrísgrjónum og salati. Stundum hefur hún útbúið jógúrtsósu með en fólkið á þessum bæ vill fá heita sósu þannig að hér er hún meira hugsuð fyrir forfallið sósufólk.
Hráefni
Kryddlögur
- 2 miðlungs laukar – saxaðir smátt
- 1 stk engifer (u.þ.b. 90 g) – rifið
- 5 – 7 hvítlauksrif – söxuð smátt
- 1,7 dl sítrónusafi
- 1 tsk kóriander
- 1 tsk cumen
- 1 tsk garam masala
- 1 tsk turmeric
- ¼ tsk mace – fæst í Krydd og Tehúsinu
- ¼ tsk múskat (nutmeg)
- ¼ tsk kanill
- ¼ tsk negull
- ¼ tsk nýmalaður pipar
- ½ tsk cayenne pipar eða eftir smekk
Kjöt
- 2 kg læri með beini sem er síðan úrbeinað – hægt að fá læri úrbeinað í matvöruverslunum þar sem kjötborð er. Einnig er hægt að úrbeina það sjálfur
Jógúrtsósa
- 1 hrein jógúrt
- Agúrka – skorin í mjög litla bita
- Örlítið af smá sætu eins og hunang
- Nýmalaður pipar
Sósa (má sleppa)
- ½ l vatn
- 1 – 2 tsk karrý
- 1 msk lambakraftur
- 2 – 4 dl matreiðslurjómi
- Salt og pipar
- Soð af lærinu
- 2 – 3 msk sósujafnari
Verklýsing
Kryddlögur
- Öllu hráefni blandað saman
- Læri úrbeinað og snyrt – flatt út með því að þrýsta því út og kryddlegi smurt á það. Lærið sett í plastpoka og geymt í kryddleginum í 2 daga í kæli. Ef snæða á kjötið eftir 1 dag er betra að láta kjötið standa lengur úti við stofuhita heldur en annars (alls ekki allan tímann en samt hluta af honum)
- Gott að taka kjötið úr kæli nokkrum tímum áður en kjötið er grillað. Ofninn hitaður í 175°C (yfir- og undirhiti) eða grillið hitað. Kjötið tekið úr plastpokanum og lagt á álbakka. Gott að setja hitamæli í mitt kjötið. Látið grillast þar til það nær 60 – 65°C (smekksatriði hversu rautt kjötið á að vera – mér finnst gott að taka það út þegar það er 63°C). Alltaf gott að láta kjötið standa og jafna sig áður það er borið fram
Jógúrtsósa
- Öllu hráefni blandað saman
Sósa
- Vatn sett í pott og hitað að suðu. Kjötkrafti bætt við og hann látinn leysast upp. Karrý bætt saman við ásamt pipar
- Sósujafnari settur út í og hitað að suðu þannig að sósan þykkni
- Matreiðslurjóma bætt við og saltað
- Soðið af lærinu bætt við (má sigta) – hrært
- Ef sósan er of þunn má setja meiri sósujafnara út í
Meðlæti
Hrísgrjón og naan brauð.
