Sólarhringsbrauð
Uppruni
Þessa uppskrift fann ég í Fréttablaðinu fyrir nokkrum árum og hef mikið notað. Hún er ótrúlega auðveld og þægileg. Fljótlegri en ferð í bakaríið. Bara að muna að leggja í brauðið kvöldið áður.
Forvinna
Þarf að gera kvöldið áður.
Hráefni
- 380 g hveiti (ef 1½ uppskrift þá 570 g)
- ¼ tsk þurrger (ef 1½ uppskrift þá 0,4 tsk)
- 1½ tsk salt (ef 1½ uppskrift þá 2,25 tsk)
- 380 ml volgt vatn (ef 1½ uppskrift þá 570 ml)
Verklýsing
- Hveiti, þurrgeri og salti blandað saman í skál
- Volgu (alls ekki of heitu, frekar aðeins kaldara) vatni blandað saman við og hrært varlega
- Breiðið plastfilmu yfir skálina og látið standa yfir nótt
- Hitið ofninn í 250°C (yfir- og undirhiti)
- Smyrjið emaléraðan stálpott eða leirpott með olíu. Það er betra að láta pottinn hitna með ofninum og setja deigið í heitan pottinn
- Látið deigið í pottinn og bakið í 30 mínútur. Hægt að strá t.d. birkifræjum eða sesamfræjum yfir brauðið áður en lokið er sett á
- Ágætt að taka lokið af síðustu 5 mínúturnar til þess að fá fallegan lit á brauðið. Fyrir þá sem vilja hafa það dökkt má brauðið vera 5 – 10 mínútur í viðbót í ofninum en fylgjast þarf vel með svo að það brenni ekki
Geymsla
Brauðið geymist vel í nokkra daga en gott er að sneiða það niður og frysta.
Bakað í leirpotti
Bakað (1½ uppskrift) í stórum emiléruðum potti – þá flest það meira út og verður þynnra
