Súrdeigsbollur - gulrætur og spelt
Uppruni
Uppskriftin er heimatilbúin og hefur verið í þróun. Dætrum mínum þykir mjög gott að eiga þessar bollur í frystinum. Ég hef alltaf búið til bollur fyrir nestið en eflaust er líka gott að baka eitt stórt brauð í staðinn.
Forvinna
Upplagt að taka súrdeigsgrunninn úr ísskápnum daginn áður þannig að hann sé tilbúinn um morguninn.
Hráefni
- 120 g súrdeigsgrunnur
- 1 msk hunang
- 400 ml volgt vatn (ekki heitara en 37°C)
- 2 tsk salt
- ½ dl chiafræ
- 100 g rúgmjöl
- 200 g spelt
- 150 g gulrætur – rifnar fínt
- 1 dl sólblómafræ
- 3 dl haframjöl
- 150 g maisenamjöl
Verklýsing
- Gott að taka súrdeigsgrunninn úr kæli a.m.k. nokkrum tímum áður en hann er notaður
- Öllu hráefni nema salti blandað vel saman í skál og látið standa í u.þ.b. 15 mínútur
- Salti stráð yfir og blandað saman með sleif (deigið á að vera blautt) – klútur eða plastfilma sett yfir skálina. Gott að láta það hefast í 3 – 4 tíma (ef lengur þá er hægt að láta það hefast í kæli t.d. yfir nótt)
- Því næst er önnur höndin bleytt í volgu vatni (til þess að deigið loði síður við hana) og deiginu ,,lyft” upp léttilega. Það er gert með því að fara með höndina ofan í skálina – meðfram brúninni og ofan í botn skálarinnar. Deiginu lyft upp með handarbakinu og síðan sleppt þannig að það falli ofan í skálina aftur. Þetta má gera tvisvar, bíða svo í u.þ.b. hálftíma og endurtaka leikinn aftur (ágætt að gera það 2 – 3 sinnum)
- Nú er deiginu hellt á speltstráða borðplötu og kúla mynduð með brauðsköfu eða sleif – deigið látið jafna sig í 20 mínútur
- Þá er svokölluð þrískipting gerð. Teygt á kúlunni með fingrunum/brauðsköfunni til beggja hliða þannig að ferhyrningur myndast
- Ferhyrningurinn er lagður saman þrefaldur – sjá mynd að neðan
- Þegar deigið er orðið þrílaga er aftur brotið í þrennt – sjá mynd
- Þá er lengjan skorin í jafnar sneiðar og bollur mótaðar með því að forma þær með brauðsköfu – einnig má gera lengjur eða það sem hverjum og einum dettur í hug
- Bollurnar settar í ofnskúffu með bökunarpappír – klútur lagður yfir og látið jafna sig í 1 – 2 klukkutíma
- Ofninn hitaður í 250°C og bollurnar bakaðar í 10 – 15 mínútur
Geymsla
Bollurnar geymast vel í lokuðum poka í frysti.
