Heimagerða lifrarkæfan hennar mömmu
Uppruni
Lifrarkæfan hennar mömmu er alveg ómissandi á jólunum. Þá er hún snædd með niðursoðnum rauðbeðum og sænska brauðinu Gotlampslimpu. Þetta er frekar stór uppskrift sem setja má í nokkur form. Það sem ekki er notað strax má setja óbakað í frysti og baka síðan við hentugleika. Ein og ein skál er tekin út, geymd í kæli yfir nótt og sett í ofninn enda er kæfan best nýbökuð.
Forvinna
Lifrarkæfuna má laga töluvert áður og geyma óbakaða í frysti.
Hráefni
- 1,5 kg svínalifur – keypt hökkuð
- 600 g spekk/svínafita
- 3 laukar
- 1 dós ansjósur
- 165 g smjör
- 165 g hveiti
- 7½ dl mjólk
- 3 egg
- 4½ tsk salt
- 2 tsk pipar
- ½ tsk negull
- Smá rjómi
Verklýsing
- Svínalifur og svínafita – blandað saman
- Laukur og ansjósur sett í blandara og bætt við lifrarblönduna
- Smjör brætt í potti og hveiti hrært saman við. Mjólk hellt út í smám saman og búinn til jafningur
- Egg sett út í ásamt salti, pipar og negul. Smá rjóma bætt við – blandað saman
- Lifrarblöndunni hrært saman við jafninginn og hitað að suðu
- Sett í eldfast mót (nokkur – fyllt að 2/3) – þau mót sem ekki á að nota strax eru sett í frystinn. Ath. ef kæfan er fryst er best að láta formið þiðna í kæli yfir nótt áður en hún er bökuð)
- Lifrarkæfan bökuð: Ofninn hitaður í 200°C (yfir- og undirhiti) og mótið sett í vatnsbað. Lok haft yfir fyrstu 30 mínúturnar. Bakað áfram í 30 mínútur án loks og vatnsbaðs
Geymsla
Geymist ágætlega í kæli í nokkra daga.