Heslihnetupavlova
Uppruni
Fann þessa uppskrift í sænsku blaði – hef aðeins breytt henni. Þetta er skemmtileg útfærsla á pavlovu – hún er jólaleg. Til að einfalda aðeins og sleppa við að rista heslihneturnar má kaupa þær ristaðar í Costco.
Forvinna
Mjög þægilegt að baka botninn áður – þá tekur enga stund að útbúa kökuna. Best er að dreifa kirsuberjasósunni yfir rétt áður en hún er borin fram … þá er hún fallegust 🙂
Hráefni
Botn
- 2 dl heslihnetur
- 5 – 6 eggjahvítur – við stofuhita
- 2½ dl hrásykur
- 1 msk maisenamjöl
- ½ msk sítrónusafi
Ofan á
- 2½ – 3 dl kirsuberjasósa – fæst í fernum
- 2 msk romm (má sleppa)
- 5 dl rjómi
- 1 msk hrásykur
- ½ tsk vanilluduft (korn) – fæst lífrænt í glerkrukkum
- 30 g suðusúkkulaði
Verklýsing
Botn
- Ef til eru ristaðar heslihnetur skal fara beint í lið nr. 3. Ofninn hitaður í 200°C og hneturnar settar í ofnskúffu. Ristaðar í tæpar 10 mínútur – fylgjast með að þær verði ekki of dökkar.
- Hneturnar settar í hreinan klút – hrista og nudda burt hýðið. Stundum vill hýðið loða svolítið við – þá er gott að nota fingurna til að ná því af
- Hneturnar grófsaxaðar, einn dl settur til hliðar og notaður til skrauts
- Ofninn lækkaður í 140°C. Eggjahvítur stífþeyttar og hrásykri bætt við rólega – einni msk í einu. Þeytt þar til blandan er þykk og líkist raksturskremi
- Maisenamjöli og sítrónusafa bætt við – þeytt. Heslihnetunum blandað saman við í lokin
- Hringur teiknaður á bökunarpappír (ágætt að nota springform til aðstoðar) – sú hlið látin snúa niður sem teiknað var á. Eggjahvítukreminu dreift í hringinn – gott að láta hliðarnar vera aðeins hærri og mynda smá dæld í miðjuna
- Bakað í 1 klukkustund og 15 mínútur. Látið kólna í ofninum yfir nótt.
Ofan á
- Rjómi þeyttur ásamt sykri og vanilludufti – dreift yfir kökuna
- Kirsuberjasósa og romm – blandað saman og dreift yfir.
- Hefla súkkulaðið með ostaskera og strá því yfir kökuna ásamt heslihnetunum sem skraut
Heslihnetur ristaðar – hægt að einfalda með því kaupa tilbúnar ristaðar heslihnetur
