Heimagert guacamole - avókadó
Uppruni
Bý þetta til þegar fajitas er á matseðlinum. Alveg ómissandi en stundum getur verið erfitt að fá gott avókadó. Best að kaupa það 1 – 2 dögum áður og láta það standa við stofuhita. Ekki kaupa það of mjúkt. Avókadó er mátulegt ef það gefur aðeins eftir þegar þrýst er á það.
Forvinna
Hægt að búa til eitthvað áður en þá er gott að hafa steininn með og skvetta smá sítrónusafa yfir þannig að maukið verði ekki brúnt.
Hráefni
- 2 avókadó
- ½ dós sýrður rjómi – u.þ.b. 1 dl
- Tæpt ½ chili (þurrt eða ferskt) – saxað mjög smátt
- Safi úr sítrónu – u.þ.b. 1 msk
- Saltflögur
- Nýmalaður pipar
Verklýsing
- Avókadó skorið í tvennt og tekið úr hýðinu með skeið. Maukað með gaffli á diski – sítrónusafa sprautað yfir
- Sýrður rjómi og chili sett út í og hrært vel saman
- Saltað og piprað
Á vel við
Þegar fajitas er á borðum.