Parmesan kjúklingur - fjölskylduvænn og góður kjúklingaréttur
Uppruni
Fann þessa uppskrift um daginn í blaði og ákvað að prófa. Rétturinn vakti mikla lukku hjá öllum aldurshópum og er hann þegar kominn á matseðil fjölskyldunnar. Prófaði að nota bæði bringur og hálfúrbeinuð læri. Misjafnt hvað þótti betra en kjúklingalærin voru mun safaríkari og stökkari en fitumeiri.
Forvinna
Sósuna má laga eitthvað áður. Hægt er að forsteikja kjúklingahlutana – geyma í einhverja stund og hita svo aftur rétt áður en rétturinn er borinn fram.
Hráefni
Parmesan kjúklingur
- 4 kjúklingabringur – skornar í tvennt eða 6 – 8 hálfúrbeinuð læri
- 1 dl hveiti
- 1 stórt egg
- 100 gr parmesanostur – fínrifinn (minna magn ef lærin eru notuð)
- Olía og ögn af smjöri til steikingar – smjörið gefur gott bragð
- Salt og pipar
Basilikusósa
- 1 dós sýrður rjómi
- 2 msk majones
- 1 hvítlauksrif – saxað smátt eða sett í hvítlaukspressu
- u.þ.b. ½ dl fersk basilika – söxuð
- Ögn af salti
Verklýsing
Basilikusósa
- Ágætt að búa sósuna til fyrst og láta hana standa aðeins. Sýrðum rjóma og majónesi hrært vel saman við
- Hvítlaukur og basilika sett út í og hrært saman. Smakkað til með salti
Parmesan kjúklingur
- Ofninn hitaður í 180°C
- Egg hrært með gaffli í skál. Hveiti sett í aðra skál og rifinn parmesanostur í þriðju skálina. Kjúklingi fyrst velt upp úr hveiti, næst upp úr eggi og að lokum upp úr parmesanostinum. Gott að hafa alla bitana tilbúna áður en þeir eru steiktir – næsta skref er að hita pönnuna og láta olíu og smjör hitna
- Kjúklingabitarnir steiktir á pönnu þar til fallegur litur er kominn á þá. Settir í eldfast mót og inn í ofn. Kjúklingarbringurnar þurfa að vera u.þ.b. 12 mínútur í ofninum eða þar til þær eru steiktar í gegn. Lærin þurfa að vera aðeins lengur eða u.þ.b 25 – 30 mínútur
Meðlæti
Gott byggsalat passar mjög vel með en einnig er hægt að hafa hrísgrjón eða kúskús. Ferskt salat er ómissandi.
Geymist
Geymist ágætlega í kæli yfir nótt. Frábært að eiga afgang og nota á Tortillapizzur daginn eftir.