Ljúffeng humarsúpa frá grunni

Servings: fyrir 4-5
Time: 2 klukkustundir
Difficulty: meðal
Print

Uppruni

Þessi uppskrift er heimatilbúin og er hún mjög vinsæl hjá heimilisfólkinu. Venjulega er fyrsta degi ársins fagnað með þessari súpu en einnig má gera hana meira hversdagslega með því að fækka humrum og bæta fiski við í staðinn. Þeir sem kjósa milda humarsúpa ættu að prófa þessa.

Það er ágætt að hafa í huga að súpan er þunn en mér hefur þótt hún góð þannig en hana má þykkja með meira af sósujafnara eða maizenamjöli. Oft bý ég til kryddblöndu sem ég set bæði í humarsoðið og í súpuna sjálfa. Hún kemur í staðinn fyrir salt og pipar í súpunni sjálfri.

Ath. Hráefnin og hlutföllin eru ekki alveg heilög. Stundum set ég meira hvítvín, sleppi sveppamulningnum og set meiri rjóma, set minna eða meira af humri… bara svona eftir því hvað ég á til.

Forvinna

Kryddblönduna og humarsoðið er hægt að búa til áður og geyma í kæli.

Hráefni

Humarsoð

½ laukur – saxaður
3 – 4 selleristilkar – niðuskornir
2 – 3 hvítlauksrif – smátt söxuð
Smjör
Skel af u.þ.b. 14 – 20 stk meðalstórum humrum. Stærð og fjöldi háð tilefni – fínt að kaupa t.d. skelbrot. Ath. best er að taka humarinn úr frysti daginn áður og láta hann þiðna í kæli. Allt sem rennur af humrinum er sett í soðið
U.þ.b. 1 l vatn (vatnið á að ná yfir humarskeljarnar)
1 tsk græn piparkorn (niðursoðin)
1 tsk rautt curry paste
1 tsk kryddblanda – má sleppa

Kryddblanda – má sleppa

1 tsk rósapipar
1 tsk ljós sinnepsfræ
½ tsk dökk sinnepsfræ
2 tsk hvílaukssalt
½ tsk svartur pipar

Humarsúpa

Smjör
14 -20 meðalstórir hreinsaðir humrar
3 – 4 msk sósujafnari
Humarsoð (hér að ofan)
3 – 4 dl hvítvín (má einnig nota freyðivín ef það er til afgangur)
1 dl mjólk/matreiðslurjómi
2 tsk kryddblanda eða salt
1 tsk capers – saxaður
Nokkrir dropar tapasco
1 – 2 msk tómatsósa t.d. heimagerð tómatsósa
1 msk sveppaduft – t.d. þurrkaður Kóngssveppur mulinn í morteli
Nokkrir dropar soyjasósa
3 – 5 gulrætur – mjög smátt saxaðar
Nýmalaður pipar
2 – 3 dl rjómi
Þeyttur rjómi og steinselja til skrauts

Verklýsing

Kryddblanda

Kryddblandan sett í mortel og aðeins steytt

Humarsoð

Smjör brætt á pönnu (eða potti) – lauk, sellerí og hvítlauk bætt út í og steikt á vægum hita í 10 – 15 mínútur. Laukurinn á ekki að brúnast heldur verða glær
Humarskelin sett á pönnuna og hitinn aðeins hækkaður – hrært í stutta stund. Vatni bætt við og hitað að suðu – látið sjóða í 10 – 15 mínútur
Niðursoðinn grænn pipar, kryddblandan og curry paste sett út í og látið malla í u.þ.b. 30 mínútur
Soð síað frá í gegnum sigti og geymt – gott að láta renna vel af. Soðið er u.þ.b. 5 – 7 dl

Humarsúpa

Smjör brætt á djúpri pönnu (eða potti) – 1 tsk kryddblanda sett á pönnuna. Humarinn látinn steikjast örstutt á góðum hita (varast að steikja of mikið), tekinn upp úr og settur á disk – vökvinn látinn renna af í pottinn aftur (þ.e. aðallega smjör með ögn af humarbragði)
Soð sett í pottinn og hitað að suðu – sósujafnari hrærður út í
Hvítvín, mjólk, capers, tabasco, soyjasósa, tómatsósa, og sveppaduft – sett út í og hrært
Gulrótum bætt við og látið krauma í 15 mínútur á meðalhita – gæta þess að hræra í reglulega
Rjóma bætt við ásamt afgangi af kryddblöndunni (eða saltað og piprað) og smakka til – gott að láta standa á lágum hita í 10 -15 mínútur (ef tími er til)
Súpan hituð að suðu – tekin af hellunni og humarinn settur út í (hægt að helminga humrana til að meira verði úr þeim) – borið strax fram. Einnig má setja 3 -5 humra í hverja skál og hella heitri súpunni ofan á. Þannig má koma í veg fyrir að humarinn ofeldist
Hver skál skreytt með þeyttum rjóma og steinselju

Meðlæti

Nýbakað brauð t.d. Hvítlauks- og ólífubrauð, Sólarhingsbrauð, Ciabatta, súrdeigsbrauð eða kaupa snittubrauð ef tíminn er naumur.

Humarsoð í vinnslu