Gæðabrauð Guðfinnu
Uppruni
Mamma bakaði þetta brauð oft á árum áður. Þegar ég fór að prófa mig áfram með súrdeigsbrauð fóru börnin á bænum að tala um brauðið sem amma þeirra bakaði einu sinni og þeim þótti svo gott. Þegar ég fór að grúska í uppskriftunum mínum fann ég uppskriftina og kemur í ljós að gæðabrauð Guðfinnu er súrdeigsbrauð. Hún gerði ýmsar útfærslu með tegundir af mjöli en ef bollurnar voru hafðar í veislum var eingöngu notað hveiti.
Hráefni
- ½ lítri vatn – hitað að 37°C (Gerbakstur – góð ráð)
- 25 g pressuger / rúmlega ½ msk þurrger
- ¼ lítri súrdeigsgrunn – sjá Súrdeigsgrunnur – til að baka súrdeigsbrauð eða Heimagerður súrdeigsgrunnur með eplum – tekur þrjá daga
- 1 lítri hveiti
- ½ lítri heilhveiti – hef prófað 2 dl rúgsigti (1dl rúgmjöl og 1 dl hveiti sigtað saman), 1 dl haframjöl og 2 dl hveilhveiti
- 2 msk ólífuolía
- 1 tsk salt
Verklýsing
- Vatn og ger blandað saman í hrærivélarskál. Öðru hráefni er bætt við og hnoðað. Bæti hveiti við ef deigið er of klístrað þar til það hættir að klessast við fingurna (ekki í samræmi við það sem ég hef lesið að ekki megi hnoða súrdeig – það virðist vera í góðu lagi)
- Látið hefast í 1 klukkustund
- Deigið sett á hveitistráða borðplötu og skorið í 4 jafnstóra hluta. Hverjum fjórðungi er síðan skipt í 8 hluta – hver hluti mótaður í mjó aflöng brauð og þau lögð á ofnskúffu með smjörpappír. Athuga að það er í góðu lagi að skipta í færri parta og hafa brauðin stærri og færri
- 32 smábrauð komast fyrir í 3 ofnskúffum. Látið hefast í 30 – 45 mínútur – undir vatnsúðuðu viskustykki
- Ofninn hitaður í 225°C
- Penslað með hrærðu eggi og birki- eða seasamfræjum stráð yfir
- Bakað í 13 mínútur
Viðbit/Álegg
Gott nýbakað með smjöri og osti en er einnig vinsælt með túnfisksalati.
Geymsla
Brauðið geymist vel í frysti og er gott að geta gripið til þess þar.
