Kartöflumús frá Perú
Uppruni
Þessa uppskrift fékk ég þegar ég bjó í Danmörku. Ætlaði alltaf að prófa hana og gerði það loksins um daginn – fannst kartöflumúsin mjög góð og ætla að búa hana til aftur.
Forvinna
Fínt að sjóða karöflurnar eitthvað áður og afhýða (geymi soðið og vökva blómin með því).
Hráefni
Kartöflumús
- 1 kg kartöflur
- 2½ dl kjúklingasoð
- Safi úr ½ appelsínu
- Safi úr ½ sítrónu
- Salt
- Cayennepipar – ég setti ½ tsk
- Tabasco – sturtaði vel 3 sinnum
Meðlæti
- 3 msk ólífuolía
- 2½ dl svartar ólífur
- 2 laukar
- 1 msk appelsínumarmelaði
Skraut
- Salatblöð
- 2 harðsoðin egg
Verklýsing
Kartöflumús
- Kartöflurnar soðnar (20 mínútur) og afhýddar – pressaðar
- Sett í skál, hrært út með kjúklingasoði ásamt appelsínu- og sítrónusafa
- Smakkað til með cayennepipar og tabasco – rétturinn á að vera sterkur
- Ágætt að hita kartöflumúsina í örbylgjuofni áður en hún er sett á fat
Meðlæti og skraut
- Egg sett í kalt vatn í potti og hitað að suðu. Hitinn lækkaður og stillt á 10 mínútur. Eggin kæld og skorin í báta
- Laukur skorinn í sneiðar. Salatblöð skoluð og sett á fat. Kartöflumús hituð og sett á fatið
- 1½ msk af olíu hituð á pönnu – ólífum bætt út í og steikt snökkglega. Sett yfir kartöflumúsina
- 1½ msk af olíu hituð á pönnu – laukhringjum bætt út í ásamt appelsínumarmelaði – steikt snögglega og sett yfir kartöflumúsina
- Skreytt með eggjabátum
Gott með
Passar vel með grilluðum kjúklingi. Grillaði einn með kjúklingakryddi frá Pottagöldrum og Seasoned salti og annan með paprikukryddi og smurði með barbecuesósu. Grillaði þá í rúman klukkutíma við180°C hita. Notaði afganginn af kartöflumúsinni daginn eftir með ofnsteiktum fiski og passaði það ágætlega saman.