Súrdeigsbrauð með spínati og fetaosti
Uppruni
Ég fæ aldrei leið á því að prófa nýjar útfærslur á súrdeigsbrauði. Hér kemur útgáfa sem er frábær fyrir bragðlaukana. Hægt er að gera eitt stórt brauð eða tvö lítil úr þessari uppskrift – einnig má auðveldlega helminga uppskriftina ef stórt brauð er of mikið.
Forvinnsla
Upplagt að byrja að morgni … láta deigið standa úti allan daginn.. gera þrískiptinguna um kvöldið. Karfan með deiginu sett í kæli yfir nótt. Ágætt að taka körfuna út 3 – 4 tímum áður en brauðið er bakað.
Hráefni
- 350 g vatn
- 100 g súrdeigsgrunnur
- 50 g heilhveiti
- 450 g hveiti
- 175 – 200 g fetaostur – skorinn í bita
- 4 dl ferskt spínat
- 10 g saltflögur
- 20 g vatn
Verklýsing
- Öllu blandað saman nema salti og 20 g af vatni. Látið standa í 30 – 40 mínútur
- Salti og 20 g af vatni bætt við – hnoðað saman með hendinni – sjá myndband
- Sett í skál eða lokað ílát og látið hefast í 8 – 10 klukkustundir við stofuhita. Ef það myndast tækifæri til að láta deigið falla öðru hvoru á höndina (sjá súrdeigsbrauð með ást og umhyggju) þá spillir það ekki fyrir en er alls ekki nauðsynlegt
- Ílátinu snúið við og sett á hveitistráð borð. Deigið látið falla á borðið. Ef tími er til þá er gott að leyfa deiginu að jafna sig í 20 – 30 mínútur. Gott að blanda saman maizenamjöli og vatni til að pennsla í körfuna – þá loðir minna við. Þrískiptingin gerð og kúla mótuð – sjá myndband. Sett í körfu og látið standa við stofuhita í 3 – 4 klukkustundir eða sett í kæli yfir nótt (eða lengur)
- Ofninn stilltur á 250°C (yfir- og undirhiti) – leirpottur látinn hitna með ofninum. Ágætt að taka deigið fyrr út eða alveg upp í 3 – 4 klukkustundir áður en það er bakað
- Deigið sett í heitan pottinn… skorið mynstur í brauðið. Bakað í 30 mínútur. Þá er lokið tekið af og bakað áfram í 20 mínútur – ágætt að fylgjast með síðustu mínúturnar ef brauðið á ekki að verða dökkt
Geymsla: Upplagt að frysta sneiðar, ef eitthvað er eftir, en einnig er gott að rista sneið í brauðrist eða þurrrista sér sneið á pönnu.
