Bleikja með dýrindis graslaukssósu – það gerist bara ekki betra

Bleikja í graslaukssósu umvafin fennel og radísum

Servings: 6 - 8
Time: 1 klukkustund
Difficulty: meðal
Print

Uppruni

Þessi réttur er bara next level… held að hann sé einn af mínum uppáhaldsréttum. Fyrir nokkru var ég í Svíþjóð og fékk ég samskonar rétt þar. Það sem gerði útslagið var sósan. Kokkurinn sagði mér það helsta sem í henni var og þegar heim var komið lagðist ég í tilraunamennsku. Sósan er frekar þunn en þeir sem vilja hafa hana þykkari geta e.t.v. notað Maizenamjöl… ég myndi samt ekki mæla með því – það er bara allt í lagi að hún sé þunn.

Forvinna

Hægt að forsjóða kartöflurnar áður og gera sósuna fyrr um daginn. Einnig má snyrta bleikjuna og skera flökin í bita eitthvað áður.

Hráefni

1½ kg bleikjuflök
1, 2 – 1,5 kg kartöflur
Salt og pipar
U.þ.b. 300 g brokkólíni eða brokkólí
Fennel – sneitt í þunnar sneiðar með flysjara
6 – 7 stk radísur – sneiddar í þunnar sneiðar með flysjara
1 búnt ferskt dill (má einnig nota 1 msk af þurrkuðu dilli)

Graslaukssósa

½ dl hvítvínsedik
2 dl hvítvín
1 gulur laukur – saxaður smátt
3 dl rjómi
50 – 80 g smjör
Salt og pipar
1 dl graslaukur – skorinn í þunna bita

Verklýsing

Graslaukssósa – gott að byrja á sósunni

Edik, hvítvín og gulur laukur sett í pott – suðan látin koma upp og hitinn lækkaður. Látið malla í pottinum með loki í 7 – 12 mínútur. Vökvinn síaður frá – magnið ætti að vera u.þ.b. 2 dl
Vökvinn settur í pott og hitaður. Rjóma bætt við og kryddað með salti og pipar. Smjörið sett í og látið bráðna – sósan tekin af hellunni – hún ætti að þykkna aðeins en hafa ber í huga að sósan á að vera þunn
Graslaukur settur í allra síðast – ekki láta sósuna sjóða mikið eftir að hann er kominn i

Kartöflur

Kartöflur soðnar (það má flysja þær fyrir eða eftir suðu). Kartöflur steiktar upp úr dilli rétt áður en fiskurinn er framreiddur

Bleikja og framreiðsla

Ofninn hitaður í 200°C – grillstilling notuð
Radísur og fennel skorið í þunnar sneiðar og þær settar í kalt vatn
Brokkólín snyrt (brokkólí skorið í hæfilega bita) og sett í sjóðandi vatn og soðið i u.þ.b. 3 – 5 mínútur (háð stærð bitanna). Vatnið látið renna af og haldið volgu
Bleikjan snyrt og roðið hreinsað aðeins með hníf. Hvert flak skorið í bita (u.þ.b. 3 bita) og sett í ofnskúffu með bökunarpappír. Í uppskriftinni þarf að nota tvær ofnskúffur
Bitunum raðað í ofnskúffuna og roðið látið snúa niður – salti og pipar stráð yfir. Bleikjan grilluð mjög ofarlega í ofninum í 1 – 2 mínútur
Fiskurinn tekinn út og bitunum snúið við – mér gengur best að nota fingurna til að snúa þeim við en einnig má nota spaða. Á meðan bitunum er snúið við má setja seinni ofnskúffuna inn
Þegar bitunum hefur verið snúið við er grófu salti stráð yfir roðið og ofnskúffan sett aftur inn í ofn í 2 – 4 mínútur eða þangað til að bólur myndast á roðinu
Vatnið látið renna af fenneli og radísum
Fiskurinn tekinn út og lagður á fat. Brokkolíni eða brokkólíbitum raðað á hvern bita – skreytt með fennel- og radísusneiðum
Sósunni hellt yfir og borið fram með dillsteiktum kartöflum

Ath. Einnig er hægt að nota laxabita – þeir geta verið þykkri og þurfa því aðeins meiri grilltíma eða 3 – 5 mínútur í seinni grillun

Graslaukssósa

Grunnur í vinnslu…