Karrýfiskréttur - einfaldur og góður
Uppruni
Ég hef gaman af því að að prófa mig áfram með rétti í leirpottunum mínum og er þetta ein tilraunin. Rétturinn er alveg afbragðs góður og ekki spillir fyrir að hann er einfaldur og fljótlegur. Með þvi að elda fiskinn í ofninum með lokinu á verður hann safaríkur og góður. Þessi réttur er góður með hrísgrjónum eða kartöflum…og svo að sjálfsögðu með brakandi fersku salati.
Leirpottur
Leirpottur, sem rúmar rúmlega 1 lítra eða meira, hentar vel fyrir þetta magn. Fyrir minni potta er bara að helminga uppskriftina.
Hráefni
- 500 – 600 g beinlaus og roðlaus fiskur – skorinn í stóra bita
- 1 msk karrý
- 2 dl rjómi eða matreiðslurjómi
- 1 paprika – skorin í litla bita (má sleppa)
- 3 gulrætur – skornar í þunnar sneiðar
- ½ – 1 laukur – skorinn þversum – þannig að sneiðarnar verða hringir
- ½ dl rjómaostur
- Salt og pipar
Verklýsing
- Ofninn hitaður í 180°C
- Fiskbitum raðað í pottinn
- Olía hituð á pönnu (gott að setja smá smjörklípu líka) – gulrætur steiktar
- Paprika sett á pönnuna og steikt áfram í nokkrar mínútur. Að lokum er laukhringjum bætt við og steikt örstutt – allt sett ofan á fiskinn
- Panna hituð og olíu hellt á. Karrý sett á pönnuna og látið aðeins hitna – rjóma bætt við og síðan rjómaosti – blandað saman og hellt yfir fiskinn
- Saltað og piprað og lokið sett yfir
- Potturinn settur í ofninn og eldað í 15 mínútur
Er / hvar er hægt að kaupa leirpotta frá þér ? Mér finnst þeir svo fallegir.
Sæl Kristín,
En gaman að heyra 🙂 Ég er með nokkra potta í Korku á Skólavörðustíg – er einmitt að vinna þar á morgun milli kl 14 -18 ef þú vilt kíkja við. Ég er svo að vinna í tveimur stórum pottum sem lofa góðu 🙂
Með kveðju, Hanna