Glimrandi góðar súrdeigsbollur
Uppruni
Það er fátt skemmtilegra en að prófa sig áfram í súrdeigsbakstri. Bjórbrauðbollur er nýjasta tilraunin – fín útkoma og tiltölulega einfalt. Eins og svo oft áður – einfalt en það þarf sinn tíma í hefingu. Upplagt að skera þessar bollur í tvennt og henda nýbökuðum í frysti. Þeir sem eru í óhollustustuði geta bætt nokkrum súkkulaðibitum við….
Forvinna
Sjálfar bollurnar má útbúa daginn áður og setja óbakaðar í ísskápinn … klára þær svo morguninn eftir og bjóða upp á nýbakaðar súrdeigsbollur með morgunkaffinu.
Hráefni
- 300 g súrdeigsgrunnur (Súrdeigsgrunnur/súrdeigsbakstur – góð ráð)
- 330 ml bjór/léttöl – best við stofuhita en hann má vera kaldur
- 2 dl heilhveiti
- 1 dl rúgmjöl
- U.þ.b. 7 dl hveiti
- 10 g sjávarsalt
- 50 g vatn
- Óhollustu útgáfa … u.þ.b. 75 g suðusúkkulaðibitar
Verklýsing
- Bjórnum hellt í stóra skál ásamt súrdeigsgrunni. Hveiti, heilhveiti og rúgmjöli bætt saman við. Blandað saman með sleikju – látið bíða í 30 – 40 mínútur
- Salti bætt við ásamt vatni – hnoðað saman með hnúanum (sjá myndir). Sett í lokað ílát – gott að eiga plastílát með loki til að nota fyrir súrdeigs- og gerbakstur. Látið hefast við stofuhita í u.þ.b. 3 klukkustundir (eða setja í kæli yfir nótt)
- Plastílátinu snúið á hvolf á rúgmjölsstráðan flöt (gott að nota sigti). Deigið látið falla á borðið (ef tími er til þá er gott að láta deigið jafna sig í 30 – 40 mínútur) – þrískiptingin gerð og kúla mótuð (sjá myndir)
- Kúlan sett aftur í ílátið og látin hefast í u.þ.b. 3 klukkustundir (enn og aftur er hægt að hægja á hefingu með því að setja í kæli)
- Ílátinu snúið aftur við og deigið látið falla sjálft á rúgmjölsstráð borðið (hægt að sigta helming af hveiti og helming af rúgmjöli) og látið jafna sig í u.þ.b. 30 mínútur
- Ofninn hitaður í 250°C (yfir- og undirhiti)
- Deiginu skipt upp í 16 – 18 bita og þeir settir á ofnplötu með bökunarpappír. Bollurnar bakaðar í 15 – 20 mínútur
Liður 1
Liður 2
Höndin notuð til að safna deigi saman og hnúanum beitt til að hnoða það – gert 2 – 3 sinnum
Kúlan sett í box og látin hefast í 3 – 4 klukkustundir
Liður 3
Deigið látið falla á borðplötuna – gott að láta það jafna sig í 30 – 40 mínútur ef tími er til
Þrískipting hefst
Það er gott að ýta létt með fingrunum í deigið hér og þar og sigta aðeins yfir áður en þrískiptingin er endurtekin