Rækjukokteill með avókadó (lárperu) og lime
Uppruni
Rækjukokteill var oft á matseðlum veitingastaða hér á árum áður. Mér þótti hann góður en erlendis fékk ég mér líka stundum avókadó með rækjum ofan í og kokteilsósu. Um daginn langaði mig að bjóða upp á sambland af þessari tvennu. Þetta er frískandi og góður réttur og ekki spillir fyrir hvað hann er einfaldur og fljótlegur.
Forvinna
Láta rækjurnar þiðna í sigti í kæli yfir nótt (hafa skál undir þannig að vökvinn renni af). Þá verða þær safaríkari. Upplagt að búa kokteilsósuna til daginn áður.
Hráefni
- 320 – 350 g rækjur
- 1 – 1½ avókadó
- Limesafi
- Heimagerð kokteilsósa
- Salat – ísberg eða það sem hverjum og einum finnst gott
- Gaman að setja baunaspírur með
- Limesneið og paprikuduft – til skrauts
Verklýsing
- Rækjurnar látnar þiðna í sigti í kæli yfir nótt
- Kokteilsósa útbúin – sjá kokteilsósa
- Avókadó – skorið í bita og blandað varlega saman við limesafann (þá verður það síður dökkt)
- Salatið sett fyrst í skálarnar og síðan baunaspírur. Rækjum og avókadó bætt við og að lokum er sósan sett yfir. Það er misjafnt hvað fólk vill mikla sósu – hef sett minna af henni í skálarnar og borið hana fram með. Látið standa i stofuhita í a.m.k. 2 klukkutíma áður en gestirnir koma.
- Skreytt með paprikudufti og limesneið
