Smátertur með marsipanhjúp

Servings: /Magn: 16 - 20 smátertur
Time: 2 -3 klukkustundir
Difficulty: meðal
Print

Uppruni

Það getur verið skemmtilegt og fallegt að bjóða upp á smátertur í eftirrétt eða í saumaklúbbnum. Það má undirbúa þær eitthvað áður og geyma í kæli. Botninn er einfalt að baka en mesta kúnstin er að fletja út hjúpinn og setja smátertuna saman (það má líka kaupa hvítan útflattan hjúp frá Odense). Ef ekki á að búa til svona margar tertur er allt í lagi að eiga afgang (mín reynsla er sú að svona botn hverfur fljótt ofan í heimilisfólkið).

Hráefni

Botn

4 egg
100 g sykur
100 g hveiti

Samsetning

4 dl rjómi
Ber eða ávextir
U.þ.b. 500 – 600 g hjúpmarsipan (hef keypt hvítan í Fjarðarkaupum – einnig er hægt að kaupa útflattan hvítan hjúpmarsipan)

Verklýsing

Botn

Ofninn hitaður í 200°C (blástur)
Egg og sykur hvítþeytt
Hveiti bætt varlega út í (sigta hveitið) – ekki of mikið í einu og hræra varlega saman á milli með sleif
Bökunarpappír settur í ofnskúffu – gott að smyrja pappírinn aðeins með hörðu smjöri
Deiginu dreift yfir pappírinn og bakað í 10 – 12 mínútur – fylgjast með svo að kakan verði ekki of dökk
Kökunni hvolft á annan bökunarpappír – hinn tekinn af og ofnskúffan sett ofan á. Það kemur í veg fyrir að kakan harðni
Hæfilega stórar hringlaga kökur skornar úr botninum (sjá mynd)

Samsetning

Rjómi þeyttur og ávextir skornir í bita. Einnig má setja heil ber eins og hindber eða bláber
Hjúpmarsipan flatt út – getur verið gott að vigta u.þ.b. 30 – 40 g fyrir hverja köku og fletja út hringlaga
Ég legg útflatta stykkið í skál, set rjóma og nokkra ávexti yfir. Botninn lagður ofan á og kökunni lokað með marsipanhjúpnum. Skálinni hvolft í lófann og kakan mótuð með fingrunum (sjá myndir). Gæta verður hreinlætis og þvo hendur reglulega – sumum finnst gott að nota einnota hanska
Skreytt með beri, flórsykri, myntu eða einhverju sem hentar árstímanum

Litlar útgáfur af smátertum með marsipanhjúp

Litlum glösum, staupum eða eggjabikurum raðað saman (sjá mynd). Útflattur marsipanhjúpur lagður yfir glösin og látinn mynda holur í glösunum. Þeyttur rjómi og ber sett ofan í (sjá myndir)
Samsetning svipuð og í stærri tertunum. Staupglas notað til að skera út hæfilega stóra hringi úr botninum og hann lagður yfir rjómann og berið

Geymsla: Kökurnar má geyma óskreyttar inn í kæli yfir nótt – hefur reynst mér best að sleppa því að setja plastfilmu yfir kökurnar.

Botn