Kjúklingur í satay sósu
Uppruni
Ég hef lengi leitað að uppskrift að sataysósu. Þessi er sambland af mörgum uppskriftum og er mjög góð – hún höfðar líka til breiðs aldurshóps sem er ákveðinn kostur. Það er einnig þægilegt að geta undirbúið réttinn 1 – 2 sólarhringum áður en bjóða á upp á hann. Þá er aðeins eftir að sjóða hrísgrjón, þræða kjötið á pinna og grilla.
Forvinna
Betra er að láta kjötið liggja í marineringu a.m.k.í nokkrar klukkustundir. Það er líka gott að láta sósuna jafna sig í nokkra klukkustundir eða jafnvel yfir nótt.
Hráefni
- 900 g kjúklingabringur – skornar í bita
- 5 – 6 hvítlauksrif eða einn stór (í körfunum)
- 2 skarlottulaukar – skornir gróft
- 1 rauður chili
- 1 tsk paprika (paprikuduft)
- 1 tsk cumin
- 1 tsk kóríander
- 3½ msk sojasósa
- 1 msk fiskisósa (Fish Sauce – t.d. frá Thai Pride)
- Safi úr 2 lime
- 260 – 300 g hnetusmjör
- 2 msk hrásykur
- U.þ.b. 3 msk engifer – rifið
- 4 – 5 litlir vel þroskaðir tómatar eða 1- 2 stórir
- Salt og pipar
Verklýsing
- Allt hráefni nema kjúklingabringurnar sett í matvinnsluvél eða öflugan blandara og maukað smátt
- Rúmlega helmingur af blöndunni settur í pott en hinu hellt yfir í ílát og kjúklingabitarnir settir út í. Lok sett yfir og geymt við stofuhita í 2 – 4 klukkustundir eða látið standa í kæli í 1 – 2 sólarhringa
- Blandan í pottinum hituð ásamt 1 – 2 dl af vatni. (Tilvalið að skola blandarann/matvinnsluvélina með því að hella vatninu í hann og mixa aðeins – hella svo því í pottinn)
- Hrært í pottinum þar til sósan dökknar – best að láta hana standa í 1 – 2 klukkustundir eða í lokuðu íláti í kæli í 1 – 2 sólarhringa (samt ekki nauðsynlegt)
- Kjúklingabitarnir þræddir á grillpinna (gott að leggja trépinna í bleyti aðeins áður – þá brenna þeir síður) og grillið hitað eða ofninn stilltur á grill
- Grillað á meðalhita í 7 – 10 mínútur (fer eftir stærð bitanna). Ef pinnarnir eru grillaðir í ofni eru þeir grillaðir í 12 – 15 mínútur (fer eftir stærð bitanna – ég á það til að ofsteikja þá)
- Sósan má vera aðeins volg eða við stofuhita
Meðlæti
Hrísgrjón, niðurskorin gúrka, laukhringir og bátar af lime.
Kjúklingur grillaður í ofni