Pistasíumarengsskeljar með mangómauki og rjóma
Uppruni
Þessi uppskrift er að mestu leyti heimatilbúin – samansett úr uppskriftum úr nokkrum blöðum.
Forvinna
Kosturinn við þennan rétt er að hægt er að forvinna margt og eiga því aðeins eftir að setja hann saman í lokin. Best að baka kökurnar daginn áður eða jafnvel nokkrum dögum áður og útbúa mangómaukið daginn áður. Best að þeyta rjómann samdægurs.
Hráefni
Marengs
- 70 g pistasíuhnetur
- 25 g möndlur – afhýddar
- 150 g flórsykur
- 3 eggjahvítur
Fylling
- 100 g frosið mangó
- U.þ.b. 12 g sykur
- Rúmlega ½ dl vatn
- 4 dl rjómi
- 35 g flórsykur – má sleppa
- Ber, æt blóm eða mynta til skrauts
Verklýsing
- Ofninn stilltur á 110°C (blástur)
- Möndlur settar í heitt vatn í nokkra stund og afhýddar (þær má einnig kaupa afhýddar)
- Möndlur muldar í matvinnsluvél eða blandara – mulningurinn lagður til hliðar og pistasíuhneturnar muldar. Þær má ekki mylja of lengi – þá getur mulningurinn orðið klesstur og olíukenndur. Það hefur ekki áhrif á bragðið en áferðin á marengsinum verður ekki eins falleg
- Hluti af pistasíumulningnum (ca 20 g) lagður til hliðar
- Eggjahvítur þeyttar aðeins og flórsykri bætt við – stífþeytt þar til hægt er að hvolfa skálinni án þess að nokkuð hreyfist
- Möndlu- og pistasíumulningnum blandað varlega saman með sleif
- Bökunarpappír settur á tvær ofnskúffur eða grindur og 7 – 9 litlar hringlaga kökur mótaðar – ágætt að búa til dæld í miðjuna til að koma fyllingunni betur fyrir
- Hluta af pistasíukurlinu stráð yfir kökurnar
- Bakað í 1½ klukkustund (má setja báðar grindurnar inn í einu þar sem bakað er á blæstri)
- Ágætt að láta kökurnar kólna í ofninum í nokkrar klukkustundir en alls ekki nauðsynlegt
Fylling
- Frosið mangó sett í pott ásamt vatni og sykri – suðan látin koma upp og látið malla í u.þ.b. 15 mínútur. Maukað í matvinnsluvél eða blandara og kælt
- Rjómi og flórsykur stífþeytt og lagt ofan í marengsskeljarnar
- Mangómauki dreift yfir. Einnig má blanda maukinu og rjómanum örlítið saman fyrst og setja síðan ofan í skeljarnar
- Skreytt með pistasíumulningi, ætum blómum, berjum eða myntu
Geymsla
Pistasíumarengsskeljarnar geymast ágætlega í nokkra daga. Sama má segja um mangómaukið.
