Létt og góð hamborgarabrauð
Uppruni
Það hefur lengi verið á dagskrá að baka mín eigin hamborgarabrauð. Ég hef gert nokkrar tilraunir en alltaf hefur vantað léttleikann. Þessi uppskrift er mjög góð – hamborgarabrauðin eru létt og held ég að galdurinn við það sé að hefingartíminn er frekar langur.
Hráefni
- 30 – 35 g smjör
- 25 g pressuger (6 g þurrger eða u.þ.b. ½ bréf)
- 2 dl undanrenna
- 1½ dl vatn
- 8 – 9 dl hveiti
- 1 msk sykur
- 1 tsk salt
- 1 egg – við stofuhita
- Olia
- Birkifræ eða sesamfræ (má sleppa)
Verklýsing
- Smjörið sett í pott og látið bráðna. Undanrennu og vatni bætt við í pottinn – blandað saman. Blandan á ekki að vera heitari en 37°C
- Pressuger sett í skál og leyst upp í hluta af blöndunni (afgangi af blöndunni bætt við)
- Sykri, salti og eggi bætt í skálina ásamt 4 – 5 dl af hveiti – öllu blandað saman með sleikju
- Afgangi af hveiti bætt við og hnoðað (í hrærivél eða á borðplötu) – bæta við hveiti þar til deigið hættir að loða við hendurnar. Betra að það sé ekki of þurrt
- Deigið sett í olíusmurða skál, rakur klútur (viskustykki) lagður yfir og það látið hefast í 1½ klukkustund
- Sett á hveitistráða borðplötu og skipt í 10 – 12 jafnstóra hluta – ef skipt er í 12 hluta er ágætt að skipta fyrst til helminga, skipta svo hverjum helmingi í þrennt og svo hverjum þriðjungi í tvennt. Þannig verða bollurnar allar jafnstórar
- Bollur mótaðar – látnar standa í 10 mínútur undir klút
- Hver bolla pensluð með volgu vatni – sesamfræ sett í skál og efri hluta bollunnar dýft ofan í sesamfræin (einnig má strá sesamfræjunum yfir)
- Bollurnar settar (varlega) í ofnskúffu með bökunarpappír og látnar hefast undir klút í 1 – 1½ klukkustund
- Hálftíma áður en þær eru fullhefaðar er gott að kveikja á ofninum – hitaður í 200°C ( blásturshiti)
- Bollurnar bakaðar í 15 – 20 mínútur og látnar kólna á grind (ágætt að breiða klút yfir ef ekki á að borða þær strax)
Geymsla
Hamborgarabrauðin eru best nýbökuð en þau eru líka fín daginn eftir eða jafnvel tveimur dögum seinna – þá er samt betra að hita þau aðeins á grillinu. Einnig frábært að eiga í frysti.
Á vel með
Heimagerðu hamborgararnir eru mjög góðir með þessum hamborgarabrauðum.
[/directions]